Данное последование не является заменой и альтернативой Божественной литургии, которая суть Таинство, и может совершаться только священником пребывающим в истине, имеющим апостольскую преемственность и хранящим чистую совесть. Но все же, как некое молитвенное правило для тех, кто не может пребывать на Божественной литургии, подобное последование допустимо и применимо. Кто-то совершает чин обедницы мирским чином, кто-то что-то еще. Литургия есть «объединяющая служба», и мне подумалось, что следует особенно заострить внимание на этом в молитве, кроме того, о том что сейчас последнее время и почти каждый идет в одиночку в этом океане лжи, отступления и торжества зла. Я никого не призываю использовать именно его для молитвы, так как в данном случае каждый выбирает свое правило сам, но все же если кому-то оно когда-то окажется полезным, значит уже его следовало публиковать.
Иеромонах Иона (Сигида)
ПОСЛЕДОВАНИЕ САМОСТОЯТЕЛЬНОГО МОЛЕНИЯ ПРЕБЫВАЮЩИМ В ОТДАЛЕНИИ ОТ ЦЕРКВИ
Во имя Отца и Сына и Святаго Духа. Аминь.
Псалом 50.
3 Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. 4 Наипа́че омы́й мя от беззако́ния моего́, и от греха́ моего́ очи́сти мя. 5 Яко беззако́ние мое́ аз зна́ю и грех мой предо мно́ю есть вы́ну. 6 Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. 7 Се бо в беззако́ниих зача́т есмь, и во гресе́х роди́ мя ма́ти моя́. 8 Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. 9 Окропи́ши мя иссо́пом, и очи́щуся, омы́еши мя, и па́че сне́га убелю́ся. 10 Слу́ху моему́ да́си ра́дость и весе́лие, возра́дуются ко́сти смире́нныя. 11 Отврати́ лице́ Твое́ от грех мои́х, и вся беззако́ния моя́ очи́сти. 12 Се́рдце чи́сто сози́жди во мне, Бо́же, и дух прав обнови́ во утро́бе мое́й. 13 Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. 14 Возда́ждь ми ра́дость спасе́ния Твоего́, и Ду́хом Влады́чним утверди́ мя. 15 Научу́ беззако́нныя путе́м Твои́м, и нечести́вии к Тебе́ обратя́тся. 16 Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. 17 Го́споди, устне́ мои́ отве́рзеши, и уста́ моя́ возвестя́т хвалу́ Твою́. 18 Яко а́ще бы восхоте́л еси́ же́ртвы, дал бых у́бо, всесожже́ния не благоволи́ши. 19 Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. 20 Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. 21 тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.
Псалом 78.
1 Бо́же, приидо́ша язы́цы в достоя́ние Твое́, оскверни́ша храм святы́й Твой, 2 положи́ша Иерусали́м я́ко ово́щное храни́лище, положи́ша тру́пия раб Твои́х бра́шно пти́цам небе́сным, пло́ти преподо́бных Твои́х звере́м земны́м. 3 Пролия́ша кровь их я́ко во́ду о́крест Иерусали́ма, и не бе погреба́яй. 4 Бы́хом поноше́ние сосе́дом на́шым, подражне́ние и поруга́ние су́щым о́крест нас. 5 Доко́ле, Го́споди, прогне́ваешися до конца́? Разжже́тся я́ко огнь рве́ние Твое́? 6 Проле́й гнев Твой на язы́ки не зна́ющыя Тебе́, и на ца́рствия, я́же и́мене Твоего́ не призва́ша, 7 я́ко поядо́ша Иа́кова, и ме́сто eго́ опустоши́ша. 8 Не помяни́ на́ших беззако́ний пе́рвых: ско́ро да предваря́т ны щедро́ты Твоя́, Го́споди, я́ко обнища́хом зело́. 9 Помози́ нам, Бо́же, Спаси́телю наш, сла́вы ра́ди и́мене Твоего́, Го́споди, изба́ви ны, и очи́сти грехи́ на́ша и́мене ра́ди Твоего́. 10 Да не когда́ реку́т язы́цы, где есть Бог их? И да уве́стся во язы́цех пред очи́ма на́шима отмще́ние кро́ве раб Твои́х пролиты́я. 11 Да вни́дет пред Тя воздыха́ние окова́нных, по вели́чию мы́шцы Твоея́ снабди́ сы́ны умерщвле́нных. 12 Возда́ждь сосе́дом на́шым седмери́цею в не́дро их поноше́ние их, и́мже поноси́ша Тя, Го́споди. 13 Мы же, лю́дие Твои́ и о́вцы па́жити Твоея́, испове́мыся Тебе́, Бо́же, во век, в род и род возвести́м хвалу́ Твою́.
Псалом. 88 (2-19).
2 Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми. 3 Зане́ рекл еси́: в век ми́лость сози́ждется, на Небесе́х угото́вится и́стина Твоя́. 4 Завеща́х заве́т избра́нным мои́м, кля́хся Дави́ду рабу́ Моему́: 5 до ве́ка угото́ваю се́мя твое́, и сози́жду в род и род престо́л твой. 6 Испове́дят Небеса́ чудеса́ Твоя́, Го́споди, и́бо и́стину Твою́ в це́ркви святы́х. 7 Я́ко кто во о́блацех уравни́тся Го́сподеви? Уподо́бится Го́сподеви в сыне́х Бо́жиих? 8 Бог прославля́емь в сове́те святы́х, Ве́лий и Стра́шен есть над все́ми окре́стными Его́. 9 Го́споди Бо́же сил, кто подо́бен Тебе́? Си́лен еси́, Го́споди, и и́стина Твоя́ о́крест Тебе́. 10 Ты влады́чествуеши держа́вою морско́ю: возмуще́ние же волн eго́ Ты укроча́еши. 11 Ты смири́л еси́ я́ко я́звена го́рдаго, мы́шцею си́лы Твоея́ расточи́л еси́ враги́ Твоя́. 12 Твоя́ суть небеса́, и Твоя́ есть земля́, вселе́нную и исполне́ние ея́ Ты основа́л еси́. 13 Се́вер и мо́ре Ты созда́л еси́, Фаво́р и Ермо́н о и́мени Твое́м возра́дуетася. 14 Твоя́ мы́шца с си́лою: да укрепи́тся рука́ Твоя́, и вознесе́тся десни́ца Твоя́. 15 Пра́вда и судьба́ угото́вание Престо́ла Твоего́: ми́лость и и́стина предъи́дете пред лице́м Твои́м. 16 Блаже́ни лю́дие ве́дущии воскликнове́ние: Го́споди, во све́те лица́ Твоего́ по́йдут, 17 и о и́мени Твое́м возра́дуются весь день, и пра́вдою Твое́ю вознесу́тся. 18 Я́ко похвала́ си́лы их Ты еси́, и во благоволе́нии Твое́м вознесе́тся рог наш. 19 Я́ко Госпо́дне есть заступле́ние, и Свята́го Изра́илева Царя́ на́шего.
Псалом 44.
2 Отры́гну се́рдце мое́ сло́во бла́го, глаго́лю аз дела́ моя́ Царе́ви: язы́к мой трость кни́жника скоропи́сца. 3 Красе́н добро́тою па́че сыно́в челове́ческих, излия́ся благода́ть во устна́х Твои́х, сего́ ра́ди благослови́ Тя Бог во век. 4 Препоя́ши мечь Твой по бедре́ Твое́й, Си́льне. 5 Красото́ю Твое́ю и добро́тою Твое́ю, и наляцы́, и успева́й, и ца́рствуй и́стины ра́ди и кро́тости, и пра́вды, и наста́вит Тя ди́вно десни́ца Твоя́. 6 Стре́лы Твоя́ изощре́ны, Си́льне, лю́дие под Тобо́ю паду́т в се́рдцы враг царе́вых. 7 Престо́л Твой, Бо́же, в век ве́ка: жезл пра́вости, жезл Ца́рствия Твоего́. 8 Возлюби́л еси́ пра́вду и возненави́дел еси́ беззако́ние, сего́ ра́ди пома́за Тя, Бо́же, Бог Твой еле́ем ра́дости, па́че прича́стник Твои́х. 9 Сми́рна и ста́кти и касси́а от риз Твои́х, от тя́жестей слоно́вых, из ни́хже возвесели́ша Тя. 10 Дще́ри царе́й в че́сти Твое́й, предста́ Цари́ца одесну́ю Тебе́, в ри́зах позлаще́нных оде́яна преиспещре́на. 11 Слы́ши, Дщи, и виждь, и приклони́ у́хо Твое́, и забу́ди лю́ди Твоя́, и дом отца́ Твоего́. 12 И возжела́ет Царь добро́ты Твоея́: зане́ Той есть Госпо́дь Твой и поклони́шися Ему́. 13 И дщи Ти́рова с да́ры, лицу́ Твоему́ помо́лятся бога́тии лю́дстии. 14 Вся сла́ва Дще́ре Царе́вы внутрь, ря́сны златы́ми оде́яна и преиспещре́на. 15 Приведу́тся Царю́ де́вы в след ея́, и́скренния ея́ приведу́тся Тебе́. 16 Приведу́тся в весе́лии и ра́довании, введу́тся в храм Царе́в. 17 Вме́сто оте́ц Твои́х бы́ша сы́нове Твои́: поста́виши я́ кня́зи по всей земли́. 18 Помяну́ и́мя Твое́ во вся́ком ро́де и ро́де. Сего́ ра́ди лю́дие испове́дятся Тебе́ в век и во век ве́ка.
Славословие.
Сла́ва в вы́шних Бо́гу, и на земли́ ми́р, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Ца́рю Небе́сный, Бо́же, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй гре́хи ми́ра, приими́ моли́тву на́шу. Седя́й одесну́ю Отца́, поми́луй нас. Яко Ты еси Еди́н Свят; Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.
На вся́к день благословлю́ Тя и восхвалю́ и́мя Твое́ во ве́ки, и в век ве́ка.
Го́споди, прибе́жище был еси нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой, яко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.
Сподо́би Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во веки́, аминь.
Буди́, Го́споди, ми́лость Твоя́ на нас, якоже́ упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси, Влады́ко, вразуми́ мя оправда́нием Твои́м. Благослове́н еси, Святы́й, просвети́ мя оправда́нии Твои́ми.
Го́споди, ми́лость Твоя́ во век, дел руку́ Твоею́ не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.
Отче наш, Любовь еси и милости подателю. Сына Твоего и Слова безначальный Родителю и Духа Твоего Утешителя благий Изводителю. Единый Боже, непостижимый, в Духе познаваемый и открываемый верным ученикам и сынам Твоим любящим Тя. Просвети нас истиною Твоею. Научи нас пребывати в любви Твоей и творити волю Твою.
Открый нам путь спасения в Господе нашем Иисусе Христе, Сыне Твоем воплотившимся, Спасителе и Искупителе нашем и Царе. Соедини нас с Ним и в Нем во едино Тело и во едино Таинство в любви Твоей. Молимся Тебе и поклоняемся и славим единого Истинного Сущего Бога, Отца и Сына и Святаго Духа. Аминь.
Господи Боже наш, молимся Тебе о владыке нашем Викторе Славянском и Южно-Российском. Просим Тя о его здравии, и о помощи в трудех его, и в служении Твоей Церкви. Милости Твоея ему ниспосли, всякое благое разумение подаждь ему, и от искушений злых сохрани. Аминь.
Господи Боже наш, молимся Тебе о пастырях Твоих, о священниках, о в тюрьмах и изгнании сущих, о труждающихся и страждущих, о болезнующих, и о всех братиях и сестрах наших [и об: имена по желанию]. Просвяти их Боже Твоею благодатию, и укрепи в борьбе и обстоянии, да с Тобою и с Церковию Твоею пребудут во единстве; И даруй им помощи Твоей и наставления, да победят врагов Твоих и не отвергнутся Тебе, и во спасение совершат путь свой. Аминь.
Господи, защити Церковь Твою и сохрани всех верных Твоих.
Господи, и всех заблудших овец Твоих приведи ко святей Твоей истинной Церкви ко спасению их.
Господи, и всех благодетелей Церкви Твоей соблюди во спасение, и милости Твоея подаждь им.
Господи Боже наш, молимся Тебе и о всех усопших братиях и сестрах наших [и об: имена по желанию], и о всех усопших людях Твоих; Милостию Твоею и силою Креста изглади им прегрешения их, и в последний день в воскресении их да неосужденно предстанут пред Тобою и да внидут во Царствие Твое. Аминь.
(кто желает, молится здесь своими словами о чем считает необходимым)
Заповеди блаженства:
Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.
Блаже́ни ни́щии ду́хом, я́ко тех есть Ца́рство Небе́сное.
Блаже́ни пла́чущии, я́ко ти́и уте́шатся.
Блаже́ни кро́тции, я́ко ти́и насле́дят зе́млю.
Блаже́ни а́лчущии и жа́ждущии пра́вды, я́ко ти́и насы́тятся.
Блаже́ни ми́лостивии, я́ко ти́и поми́ловани бу́дут.
Блаже́ни чи́стии се́рдцем, я́ко ти́и Бо́га у́зрят.
Блаже́ни миротво́рцы, я́ко ти́и сы́нове Бо́жии нареку́тся.
Блаже́ни изгна́ни пра́вды ра́ди, я́ко тех есть Ца́рство Небе́сное.
Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.
Ра́дуйтеся и весели́теся, я́ко мзда ва́ша мно́га на Небесе́х.
Аминь.
Господи Иисусе Христе, учителю и наставниче, Ты заповедал еси нам: аще кто не отвергнется себе и не возьмет креста своего и вслед Тебе пойдет не может быть Твоим учеником. Научи нас себе отвергатися, без лукавства, и нести крест наш, в терпении и любви, по заповедям Твоим. Спасителю наш и Боже наш, отпусти нам наши прегрешения и не остави нас.
Аминь.
(кто желает, может прочитывать особое евангелие праздника, дня)
От Матфея Святаго Евангелия чтение.
(гл. 24,4-18,21,29-33. Лк. 21,34-36)
Рече́ Госпо́дь Свои́м ученико́м: блюди́ те, да никто́ же вас прельсти́т. Мно́зи бо прии́дут во и́мя Мое́, глаго́люще: Аз есмь Христо́с, и мно́ги прельстя́т. Услы́шати же и́мате бра́ни и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́к, и ца́рство на ца́рство, и бу́дут гла́ди и па́губы и тру́си по ме́стом, вся же сия́ нача́ло боле́знем. Тогда́ предадя́т вы в ско́рби и убию́т вы, и бу́дете ненави́дими все́ми язы́ки и́мене Моего́ ра́ди. И тогда́ соблазня́тся мно́зи, и друг дру́га предадя́т, и возненави́дят друг дру́га, и мно́зи лжепроро́цы воста́нут и прельстя́т мно́гия, и за умноже́ние беззако́ния, изся́кнет любы́ мно́гих. Претерпе́вый же до конца́, той спасе́тся. И пропове́стся сие́ Ева́нгелие Ца́рствия по всей вселе́нней, во свиде́тельство всем язы́ком, и тогда́ прии́дет кончи́на. Егда́ у́бо у́зрите ме́рзость запусте́ния, рече́нную Дании́лом проро́ком, стоя́щу на ме́сте свя́те, - тогда́ су́щии во Иуде́ и да бежа́т на го́ры, и и́же на кро́ве, да не схо́дит взя́ти я́же в дому́ его́, и и́же на селе́, да не возврати́тся вспять взя́ти риз свои́х… Бу́дет бо тогда́ скорбь ве́лия, якова́ же несть была́ от нача́ла ми́ра досе́ле, ниже́ и́мать бы́ти… А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спа́дут с небесе́, и си́лы небе́сныя подви́гнутся, и тогда́ яви́тся зна́мение Сы́на Челове́ческаго на небеси́, и тогда́ воспла́чутся вся коле́на земна́я и у́зрят Сы́на Челове́ческаго гряду́ща на о́блацех небе́сных с си́лою и сла́вою мно́гою, и по́слет А́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их. От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва. Та́ко и вы, егда́ ви́дите сия́ вся, ве́дите, я́ко близ есть, при две́рех. … Внемли́те же себе́, да не когда́ отягча́ют сердца́ ва́ша объяде́нием и пия́нством и печа́льми жите́йскими, и на́йдет на вы́ внеза́пу де́нь то́й: я́ко се́ть бо прии́дет на вся́ живу́щыя на лицы́ всея́ земли́. Бди́те у́бо на вся́ко вре́мя моля́щеся, да сподо́битеся убежа́ти все́х си́х хотя́щих бы́ти, и ста́ти пред Сы́ном Челове́ческим.
Аминь.
Иисусе Христе Боже наш, Ты открыл еси нам тайны Царствия Твоего и последних дней мира. Сохрани нас от искушений сих. Умудри нас противоборствовати противу диавола; и помози нам совершити путь наш в подвизе исповедания и свидетельства истины Твоея, дабы и нам не возлюбити жизни своей даже до смерти (Откр.12,11), но сохранити верность Тебе. Аминь.
Господи помилуй нас (12).
Господи Иисусе Христе, Спасителю наш и Боже наш, Ты заповедал еси нам собиратися вкупе и дал еси власть апостолам Твоим и пресвитерам совершати пречистые Твои таинства ко спасению нашему Тобою устроенному. Даждь и нам в соединении собрания верных Твоих быти, аще и не видимо, но в единстве сердец и Духа небесной и земной Церкви Твоей.
Уврачуй наши недуги и немощи и даждь нам пребывати в истине Твоей и в любви Твоей, в единстве с Церковью Твоей истинной и верной, враждующей против диавола под начальством Твоим. Укрепи нас силою Твоею и введи в единство таинств Твоих, да откроеши нам путь креста Твоего и воскресения. И да будем вси едино под главенством Твоим. Аминь.
Символ Веры.
Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым.
И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша.
Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася.
Распя́таго же за ны при Понти́йстем Пила́те, и страда́вша, и погребе́нна.
И воскре́сшаго в тре́тий день по Писа́нием.
И возше́дшаго на Небеса́, и седя́ща одесну́ю Отца́.
И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.
И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки.
Во еди́ну Святу́ю, Собо́рную и Апо́стольскую Це́рковь.
Испове́дую еди́но креще́ние во оставле́ние грехо́в.
Ча́ю воскресе́ния ме́ртвых,
И жи́зни бу́дущаго ве́ка. Ами́нь.
Молитва Господня.
О́тче наш, И́же еси́ на Небесе́х,
да святи́тся и́мя Твое́,
да прии́дет Ца́рствие Твое́,
да бу́дет во́ля Твоя́, я́ко на Небеси́ и на земли́.
Хлеб наш насу́щный да́ждь нам днесь;
и оста́ви нам до́лги на́ша, я́коже и мы оставля́ем должнико́м на́шим;
и не введи́ нас во искуше́ние, но изба́ви нас от лука́ваго.
Яко Твое есть царство и сила и слава во веки. Аминь.
Псалом 117 (14-29).
14Кре́пость моя́ и пе́ние мое́ Госпо́дь, и бысть ми во спасе́ние. 15Глас ра́дости и спасе́ния в селе́ниих пра́ведных: 16десни́ца Госпо́дня сотвори́ си́лу. Десни́ца Госпо́дня вознесе́ мя, десни́ца Госпо́дня сотвори́ си́лу. 17Не умру́, но жив бу́ду, и пове́м дела́ Господня́. 18Наказу́я наказа́ мя Госпо́дь, сме́рти же не предаде́ мя. 19 Отве́рзите мне врата́ пра́вды, вшед в ня испове́мся Го́сподеви. 20Сия́ врата́ Госпо́дня, пра́веднии вни́дут в ня. 21Испове́мся Тебе́, я́ко услы́шал мя еси́, и был еси́ мне во спасе́ние. 22Ка́мень, его́же небрего́ша зи́ждущии, сей бысть во главу́ у́гла: 23от Го́спода бысть сей, и есть ди́вен во очесе́х на́ших. 24Сей день, его́же сотвори́ Госпо́дь, возра́дуемся и возвесели́мся в онь. 25О, Го́споди, спаси́ же, о Го́споди, поспеши́ же. 26Благослове́н гряды́й во и́мя Госпо́дне, благослови́хом вы из до́му Госпо́дня. 27Бог Госпо́дь, и яви́ся нам: соста́вите пра́здник во учаща́ющих до рог олтаре́вых. 28Бог мой еси́ Ты, и испове́мся Тебе́, Бог мой еси́ Ты, и вознесу́ Тя. Испове́мся Тебе́, я́ко услы́шал мя еси́, и был еси́ мне во спасе́ние. 29Испове́дайтеся Го́сподеви, я́ко Благ, я́ко в век ми́лость Его.
Иисусе Христе Боже наш,
Ты ввел еси нас в Церковь Твою и ко святой Твоей и тайной Вечери причащатися святого Тела и Крови Твоея, во единство с Тобою и учениками Твоими, во единстве сердец и духа, в любви Твоей.
Сподоби нас соучастниками быти св. Твоей и Тайной вечери,
благослови нас и прими нас, не остави затворенными двери вечери Твоея, яко пред неразумными девами (Мф. 25),
но прими нас, яко нищих и убогих, не отвергшихся Тебе (Мф. 22).
Господи, милостивно просим, прими покаяние наше,
Ты веси вся внутреннее наше, Сердцеведче,
прости нас и сподоби с Тобою быти в будущем веце.
Учителю наш, Спасителю, Царю и Боже,
не прогневайся на нас, но приими на вечерю Твою и на брачный пир Твой. Аминь.
(Если имеешь запасные дары для причастия здесь читается молитва перед причастием: «Верую Господи и исповедаю, яко ты еси воистину Христос…» и причащаются святых таин самостоятельно. И далее после причастия: «Ныне отпущаеши раба Твоего, Владыко, по глаголу Твоему с миром, яко видеста очи мои спасение Твое, еже еси уготовал пред лицем всех людей, свет во откровение языков и славу людей Твоих Израиля. Аминь.»)
Аллилуиа. Аллилуиа. Аллилуиа. Слава Тебе Боже. (Трижды)
Богоро́дице Де́во, ра́дуйся, благода́тная Мари́е, Госпо́дь с Тобо́ю, Благослове́нна Ты в жена́х и благослове́н Плод чре́ва Твоего́, я́ко Спа́са родила́ еси́ душ на́ших. (3 раза)
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
(Если кто желает может читать, петь, тропарь и кондак праздника, святого.)
Псалом 67.
2Да воскре́снет Бог, и расточа́тся врази́ Егo, и да бежа́т от лица́ Его ненави́дящии Его. 3 Яко исчеза́ет дым, да исче́знут, я́ко та́ет воск от лица́ огня́, та́ко да поги́бнут гре́шницы от лица́ Бо́жия, 4а пра́ведницы да возвеселя́тся, да возра́дуются пред Бо́гом, да насладя́тся в весе́лии. 5 Воспо́йте Богу, по́йте и́мени Его, путесотвори́те возше́дшему на за́пады. Госпо́дь и́мя Ему, и ра́дуйтеся пред Ним. 6Да смяту́тся от лица́ Его, Отца́ си́рых и судии́ вдови́ц: Бог в ме́сте святе́м Свое́м. 7Бог вселя́ет единомы́сленныя в дом, изводя́ окова́нныя му́жеством, та́кожде преогорчева́ющыя живу́щыя во гробе́х. 8Бо́же, внегда́ исходи́ти Тебе́ пред людьми́ Твои́ми, внегда́ мимоходи́ти Тебе́ в пусты́ни, 9 земля́ потрясе́ся, и́бо небеса́ ка́нуша от лица́ Бо́га Сина́ина, от лица́ Бо́га Изра́илева. 10Дождь во́лен отлучи́ши, Бо́же, достоя́нию Твоему́ и изнемо́же, Ты же соверши́л еси́ е́. 11Живо́тная Твоя́ живу́т на ней, угото́вал еси́ бла́гостию Твое́ю ни́щему, Бо́же. 12Госпо́дь даст глаго́л благовеству́ющым си́лою мно́гою. 13Царь сил возлю́бленнаго, красото́ю до́му раздели́ти коры́сти. 14Аще поспите́ посреде́ преде́л, криле́ голуби́не посре́брене, и междора́мия ея́ в блеща́нии зла́та. 15Внегда́ ра́знствит Небе́сный цари́ на ней, оснежа́тся в Селмо́не. 16Гора́ Бо́жия, гора́ ту́чная, гора́ усыре́нная, гора́ ту́чная. 17Вску́ю непщу́ете го́ры усыре́нныя? Гора́, ю́же благоволи́ Бог жи́ти в ней, и́бо Госпо́дь всели́тся до конца́. 18Колесни́ца Бо́жия тма́ми тем, ты́сяща гобзу́ющих, Госпо́дь в них в Сина́и во святе́м. 19Возше́л еси́ на высоту́, плени́л еси́ плен, прия́л еси́ дая́ния в челове́цех, и́бо не покаря́ющыяся, е́же всели́тися. 20Госпо́дь Бог благослове́н, благослове́н Госпо́дь день дне, поспеши́т нам Бог спасе́ний на́ших. 21Бог наш, Бог е́же спаса́ти, и Госпо́дня, Госпо́дня исхо́дища сме́ртная. 22Оба́че Бог сокруши́т главы́ враго́в Свои́х, верх влас преходя́щих в прегреше́ниих свои́х. 23Рече́ Госпо́дь: от Васа́на обращу́, обращу́ во глубина́х морски́х. 24Яко да омо́чится нога́ Твоя́ в кро́ви, язы́к пес твои́х, от враг от него́. 25Ви́дена бы́ша ше́ствия Твоя́, Бо́же, ше́ствия Бо́га моего́ Царя, и́же во святе́м, 26предвари́ша кня́зи близ пою́щих, посреде́ дев тимпа́нниц. 27В це́рквах благослови́те Бо́га, Го́спода от исто́чник Изра́илевых. 28Та́мо Вениами́н юне́йший во у́жасе, кня́зи Иу́довы влады́ки их, кня́зи Завуло́ни, кня́зи Неффали́мли. 29Запове́ждь, Бо́же, си́лою Твоею, укрепи́, Бо́же, сие́, е́же соде́лал еси́ в нас. 30От хра́ма Твоего́ во Иерусали́м Тебе́ принесу́т ца́рие да́ры. 31Запрети́ звере́м тро́стным, сонм юне́ц в ю́ницах людски́х, е́же затвори́ти искуше́нныя сребро́м, расточи́ язы́ки хотя́щыя бра́нем. 32Прии́дут моли́твенницы от Еги́пта, Ефио́пиа предвари́т ру́ку свою́ к Бо́гу. 33Ца́рства земна́я, по́йте Богу, воспо́йте Го́сподеви, 34возше́дшему на Не́бо небесе́ на восто́ки, се даст гла́су Своему глас си́лы. 35Дади́те сла́ву Бо́гови, на Изра́или велеле́пота Его, и си́ла Его на о́блацех. 36Ди́вен Бог во святы́х Своих, Бог Изра́илев: Той даст си́лу и держа́ву лю́дем Своим, благослове́н Бог.
Слава Отцу и Сын и Святому Духу. И ныне и присно и во веки веков. Аминь.
Псалом 109.
1Рече Госпо́дь Го́сподеви моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. 2 Жезл си́лы по́слет ти Госпо́дь от Сио́на, и госпо́дствуй посреде́ враго́в Твои́х. 3С Тобо́ю нача́ло в день си́лы Твоея́, во све́тлостех святы́х Твои́х, из чре́ва пре́жде денни́цы роди́х Тя. 4Кля́тся Госпо́дь и не раска́ется: Ты иере́й во век, по чи́ну Мелхиседе́кову. 5Госпо́дь одесну́ю Тебе́ сокруши́л есть в день гне́ва Своего́ цари́. 6Су́дит во язы́цех, испо́лнит паде́ния, сокруши́т главы́ на земли́ мно́гих. 7 От пото́ка на пути́ пие́т, сего́ ра́ди вознесе́т главу́.
Господи помилуй нас (12).
Боже, прими сердце мое,
В любви к Тебе обращаемое
И в жертву Тебе приносимое.
Прими сердце мое Боже
И соделай для мира сего умершим,
Но для Тебя и в Тебе живущим сотвори.
Да будет Твоим сердце мое, Боже,
Мене же не принадлежащим,
Но Твоею волею и любовию живущим.
Да будет Крест Твой в сердце моем, Боже,
И утвердится,
И совершится таинство любви Твоей и брака Твоего.
Аминь.
Отче наш, Любовь еси и пребываяй в любви в Тебе пребывает и Ты в них пребываеши;
Отче наш, научи нас любити Тя всем сердцем нашим и помышлением и крепостию и силою;
Открый нам любовь Твою Боже, в нищете духа, в жертве совершенной сердец наших, в милости, в верности истине, во исполнении всеблагой воли Твоей;
Даруй нам ревность и разум в делании любви и несении креста нашего, во образ Креста Сына Твоего.
Да вси пребудем в совершенном единстве и в совершенной любви с Тобою, с Господом нашим Иисусом Христом, и с пресвятым Утешителем Духом, во веки. Аминь.
+ + +